کرکٹ کی ایشیائی جنگ؛ لشکر آج سے دبئی میں پڑائو ڈالیں گے

دبئی/ کرکٹ کی ایشیائی جنگ کیلئے کرکٹ ٹیموں نے کل اتوار سے دبئی میں پڑائو ڈالا جب کہ پیر سے تیاریوں کی حتمی جانچ شروع ہوگی۔ایشیا کپ کی ٹرافی کو دبئی میں آئی سی سی کرکٹ اکیڈمی میں ہفتے کے روز چند گھنٹوں کیلئے رکھا گیا تاکہ شائقین کرکٹ قریب سے اس کا نظارہ کرسکیں۔ اس موقع پر بھارتی کرکٹ بورڈ کے مارکیٹنگ منیجر پربھاکرن دھنراج بھی موجود تھے، وہ بی سی سی آئی اور ایشین کرکٹ کونسل دونوں کی نمائندگی کررہے تھے، دبئی اسپورٹس سٹی کے چیف فنانشل آفیسر وجے سجانہر بھی ان کے ہمراہ تھے۔ایشیا کپ میں حصہ لینے والی ٹیموں کی یو اے ای آمد کا سلسلہ اتوار سے شروع ہوا جبکہ وہ ٹریننگ کا آغاز پیر سے دبئی اسپورٹس سٹی میں قائم آئی سی سی اکیڈمی میں کریں گی۔ آخری مرتبہ ایشیا کپ کا ایونٹ ون ڈے فارمیٹ میں 2014 میں کھیلا گیا تھا جس میں سری لنکا نے ٹرافی جیتی تھی، تب آئی لینڈرز کی قیادت انجیلو میتھیوز کے پاس تھی جو اس وقت بھی ٹیم کے قائد اور ایک بار پھر ٹرافی اپنے وطن واپس لے جانے کیلئے پْراعتماد ہیں۔انھوں نے کہاکہ ہماری ٹیم نوجوان اور سینئر کھلاڑیوں سے مزین ہے، مجھے اس ایونٹ کیلئے بہترین اسکواڈ ملا، ہمارے پاس کسی بھی ٹیم کو زیر کرنے کی صلاحیتیں اور توانائیاں موجود اور ہم آنے والے چیلنجز کا سامنا کرنے کیلئے تیار ہیں۔یاد رہے کہ اس ایونٹ میں کوالیفائر کیلئے مختص واحد جگہ پر ہانگ کانگ نے قبضہ کیا جس نے کوالیفائنگ ایونٹ کے فیصلہ کن معرکے میں یو اے ای کو شکست دی تھی۔اس کے کپتان انوشمان راٹھ ایشیائی شوپیس ایونٹ میں جگہ بنانے اور پاکستان و بھارت کے ساتھ گروپ اے میں مقابلے کا موقع پانے پر کافی خوش ہیں،انھیں اس بات کی بھی خوشی ہے کہ وہ کوالالمپور میں کھیلے گئے ایشین کپ کوالیفائرز کے فائنل میں یو اے ای کو شکست دینے میں کامیاب رہے۔ادھر دبئی اسپورٹس سٹی کے سی ایف اور وجے نے کہا ہے کہ ایشیا کپ کیلئے ہماری تیاریاں حتمی مراحل میں داخل ہوچکی ہیں، میں سمجھتا ہوں کہ یہ آج تک کی تاریخ کا سب سے بہترین ایشین ایونٹ ثابت ہوگا۔

مزید دیکهے

متعلقہ خبریں